गलेश्वर धामको १०८ रोपनी जग्गा गायब !

अमृत बास्कुने, म्याग्दी
प्रसिद्ध धार्मिक स्थल म्याग्दीको गलेश्वर धामको झण्डै एक सय आठ रोपनी गुठीको जग्गा गायव भएको छ । मन्दिर व्यवस्थापन तथा सञ्चालनका लागि स्थापना गरिएको गुठीको जग्गा गलेश्वर शिवालय क्षेत्र विकास कोषको तथ्यांक अनुसार हराएको हो ।

जिल्ला मालपोत कार्यालयको रेकर्डमा जमिन देखिए पनि गलेश्वर शिवालय क्षेत्र विकास कोषसँग त्यसको कुनै पनि रेकर्ड देखिएको छैन । गलेश्वर शिवालय क्षेत्र विकास कोषका अध्यक्ष माधवप्रसाद रेग्मीका अनुसार शिवालयको हाल करिब ५६ रोपनी जग्गाको लालपुर्जा रहेको छ । पहिला सृजना गरिएको गुठी र पछि पानीका लागि भनेर जलजला गाउँपालिका पर्वतमा खरिद गरिएको एक रोपनी जग्गा गलेश्वर शिव गुठीको नाममा रहेको उहाँको भनाई छ ।

तर मालपोत कार्यालय म्याग्दीको रेकर्ड अनुसार भने गलेश्वर शिव गुठीका नाउँमा विभिन्न स्थानमा गरी एक सय ६४ रोपनी भन्दा धेरै जग्गा देखिएको छ । मालपोत कार्यालयले दिएको जानकारी अनुसार गलेश्वर शिव गुठीको एक सय ६४ रोपनी ९ आना दुई दाम जग्गा देखिन्छ । उक्त तथ्य अनुसार बेनी नगरपालिका–५ पुलाचौरमा ९ रोपनी ८ आना ३ पैसा २ दाम, अर्थुङ्गेमा ६ रोपनी १० आना ३ पैसा ३ दाम र बेनी नगरपालिका ९ घतान क्षेत्रमा १४९ रोपनी ९ पैसा २ दाम गुठीको जग्गा भएको देखिन्छ ।

गलेश्वर शिवालय क्षेत्र विकास कोषसँग पुलाचौर तथा अर्थुङ्गेको तथ्यांक देखिदैन भने घतान क्षेत्रको पनि मात्रै ५६ रोपनी हाराहारी जमिनको मात्र जग्गाधनी पुर्जा छ । गलेश्वर शिवालय क्षेत्र विकास कोषका अध्यक्ष माधवप्रसाद रेग्मीले विगतमा को कसले कसरी जग्गा हडपे थाहा भएन तर अहिले भएको जग्गाको सुरक्षा गर्ने काम गरेको बताउनुभयो । उहाँले गुठी संस्थाका निर्देशकसँग पनि आफूले समन्वय गरेको भए पनि त्यहाँबाट पनि खासै सकारात्मक प्रतिकृया नआएको बताउनुभयो ।

उहाँले भन्नुभयो ‘भकारीलाई नाम्लो लगाएर बोक्न सकिदैन लगेका लगि हाले, अब भएकोलाई सुरक्षा गर्नुपर्छ, पहिला सुरक्षा गर्ने तर्फ समिति वा संस्थागत कुनै निकाय नभएकोले अरुले हडपेको होलान् तर अब सबै हाम्रो जमिनलाई पर्खाल लगाएरै जोगाउने काम गरेका छौं, अहिले गलेश्वर मन्दिर वरपर रहेको जमिनलाई सुरक्षा दिइएको छ अन्यत्र भएको कतिपय जमिन व्यक्तीले हडपे ।’

‘बेनी नगरपालिका–४ आंगे बजर नजिकको क्षेत्रमा पनि गलेश्वरको शिव गुठीको जग्गा रहेकोमा तत्कालीन अवस्थामा स्थानीय चक्रबहादुर केसीले आफ्नो बनाएका हुन्’ अध्यक्ष रेग्मीले भन्नुभयो ।

अधिवक्ता तथा गलेश्वरका स्थानीय वासिन्दा प्रेमबहादुर कार्कीले आफूहरुलाइ गलेश्वरको नाममा यतिका धेरै जमिन रहेको थाहै नभएको बताउनुभयो । उहाँले गलेश्वर शिवालय क्षेत्र विकास कोषले आफ्नो जमिन खोज्नका लागि उचित कानुनी प्रयास गर्नु पर्ने तर्फ सोच्नु पर्ने तर्क गर्नुभयो ।

यो पनि पढ्नुहोस्