आदर्श सञ्चार, बागलुङ
पश्चिम बागलुङको ढोरपाटन उपत्यकाबाट फिल्म ‘ऐरी’को छायांकन थालिएको छ । अभिनेता प्रदीप खड्कासहित चुम दरङ र सोनमले बुधबारदेखि एक्सन फिल्मको सुटिङ थालिएको छ ।
धीरज मगर र भुटानी अभिनेता सांगे सेल्ट्रिम आगामी साता छायांकनमा सहभागी हुनेछन् । बुधबारदेखि छायांकन सुरु भएको ढोरपाटन नगरपालिकाका कार्यवाह नगरप्रमुख कल्याण कायतले जानकारी दिनुभयो । उहाँले ढोरपाटनमा चलचित्र छायङ्नका लागि घर समेत निर्माण थालिएको छ । सलमान खानले होस्ट गर्ने भारतको चर्चित टिभी रियालिटी शो ‘बिग बोस’को पछिल्लो सिजनबाट चर्चामा आएकी बलिउड अभिनेत्री समेत रहेकी चुमले यो फिल्मबाट नेपाली फिल्ममा डेब्यु गदैछिन् । फिल्ममा उनी प्रदीपको अपोजिटमा देखिनेछिन् ।
ढोरपाटनमा मात्र ५० दिन छायांकन हुने जनाइएको छ । त्यसपछि काठमाडौं र भारतमा छायांकन तयारी छ । छायांकनकै बीचमा आगामी साता प्रदीप कान्स फिल्म फेस्टिभलमा सहभागी हुन केही दिनको लागि फ्रान्स जाने अपेक्षा गरिएको छ । कान्स मार्केटमा उनको आगामी फिल्म ‘एक्लो’ पिचिङ हुँदैछ । यसबारे स्वतन्त्र पुष्टि हुन बाँकी छ ।
‘ऐरी’लाई जीवन थापाले निर्देशन गरिरहेका छन् । ढोरपाटन शिकार आरक्ष क्षेत्रको जंगल क्षेत्रमा छायांकन हुनेछ । हिमाली परिवेश भएकाले त्यहाँको जनजीवन दर्शाउन घोडाचढी र तिर हान्ने जस्ता कौशल कलाकारले सिकिरहेका छन् । छायांकन ३ महिना चल्ने, ८ महिना भीएफएक्स गर्दैमा बित्ने भएकाले फिल्मको निर्माण हुन १ वर्ष लाग्ने बताइन्छ ।
यो फिल्मलाई निर्देशक थापाको उपकरण कम्पनी मल्टिमेटले भारतीय वितरकसँगको सहकार्यमा निर्माण गर्दैछ । नेपाली र हिन्दी भाषामा बन्ने यो फिल्मलाई केही क्षेत्रीय भाषामा पनि स्वरांकन गर्ने बताइएको छ ।
