खेमराज गौतम, बागलुङ
बागलुङका स्थानीय तहलाई आगमी आर्थिक वर्षका लागि रु.४ अर्ब ५५ करोड ३६ लाख बजेट विनियोजन भएको छ ।
अन्तर सरकारी वित्तीय हस्तान्तरण अन्र्तगत आगमी आर्थिक वर्षका लागि विनियोजन भएको रु.४ अर्ब ५५ करोड ३६ लाख बजेट मध्ये रु. ४ अर्ब ९ करोड ८ लाख चालु र रु.४६ करोड २८ लाख पुँजिगत बजेट रहेको छ ।
संघीय सरकारले समानीकरण अनुदान, सशर्त अनुदान, विशेष अनुदान, सपपूरक अनुदान र राजश्व बाँडफाँटलगायत शीर्षकमा स्थानीय तहलाई बजेट विनियोजन गरेको हो । १० स्थानीय तह रहेको बागलुङमा संघीय सरकारबाट चालु आर्थिक वर्षको तुलनामा आगमी आर्थिक वर्षका लागि रु. १८ करोड ११ लाख बजेट घटेर आउने भएको छ ।
चालु आर्थिक वर्षमा बागलुङमा रु.४ अर्ब ७३ करोड ४७ लाख बजेट विनियोजन भएको थियो । जिल्लाका चार नगरपालिका र छ गाउँपालिकालाई संघीय सरकारले आर्थिक वर्ष २०८२÷८३ का लागि बजेट बाँडफाँट गरेको हो ।
विनियोजित बजेट मध्ये सबैभन्दा बढी बजेट बागलुङ नगरपालिका र सबैभन्दा थोरै तमानखोला गाउँपालिकामा रहेको छ । चार नगरपालिकालाई रु.२ अर्ब ४३ करोड ८ लाख र छ गाउँपालिकालाई रु. २ अर्ब १२ करोड २८ लाख बजेट बाँडफाड गरिएको छ । आगमी आर्थिक वर्षका लागि बागलुङ नगरपालिकामा रु. ९१ करोड ३५ लाख, ढोरपाटन नगरपालिकामा रु. ४१ करोड ५३ लाख, जैमिनी नगरपालिकामा रु.५६ करोड ७८ लाख, गलकोट नगरपालिकामा रु. ५३ करोड ४२ लाख विनियोजन भएको छ ।
यस्तै काठेखोला गाउँपालिकामा रु. ४४ करोड ५५ लाख, तमानखोला गाउँपालिकामा रु.२० करोड ३४ लाख, ताराखोला गाउँपालिकामा रु. २६ करोड ४५ लाख, निसीखोला गाउँपालिकामा रु. ३६ करोड ८३ लाख, बडिगाड गाउँपालिकामा रु. ५५ करोड ४८ लाख र बरेङ गाउँपालिकामा २८ करोड ६३ लाख बजेट विनियोजन भएको छ ।
१० स्थानीय तहका लागि समानीकरण अनुदानबापत रु.एक अर्ब ८४ लाख, सर्शत अनुदान तर्फ रु. २ अर्ब ३६ करोड १४ लाख, विशेष अनुदान तर्फ रु. १२ करोड ८१ लाख र समपुरक अनुदान शिर्षकमा रु. १५ करोड ५७ लाख बजेट बाँडफाड गरिएको हो ।
स्थानीय तहले संघीय सरकारको अनुदान, प्रदेश सरकारको अनुदान र स्थानीय स्रोतसमेत समावेश गरेर स्थानीय तहले बजेट बनाउने गरेका छन् ।
संघीय सरकारको बजेट आएसँगै बागलुङका स्थानीय तहले धमाधम नीति तथा कार्यक्रम र बजेट बनाउने काम थालेका छन् । संघीय सरकारको बजेट आएसंगै पालिकाले नीति तथा कार्यक्रम निर्माणमा लागेको बागलुङ नगरपालिकाका नगरप्रमुख बसन्त कुमार श्रेष्ठले जानकारी दिनुभयो ।
बागलुङ नगरापालिकाका लेखा अधिकृत डिल्लि प्रसाद शर्माले चालु आर्थिक वर्षको तुलनामा बागलुङ नगरपालिकालाई संघीय सरकारबाट रु.२८ करोड ३९ लाख बजेट घटेर आएको बताउनुभयो । चालु आर्थिक वर्षमा नगरपालिकालाई संघीय सरकारले रु. एक अर्ब १९ करोड ७४ लाख बजेट विनियोजन गरेको थियो । चालु आर्थिक वर्षमा बागलुङ नगरपालिकाले संघीय, प्रदेश र स्थानीय तहको आम्दानीबाट रु. एक अर्ब ६४ करोडको बजेट ल्याएको थियो ।
चालु आर्थिक वर्षका लागि रु. ३८ करोड रकम विश्व बैंकको शहरी शासकीय पूर्वाधार योजना मार्फत सडक कालोपत्र गर्न आएकाले चालुको तुलनामा धेरै बजेट घटेर आएको देखिएको शर्माको भनाई छ ।
उहाँले चालु आर्थिक वर्षको तुलनामा तीन सडक कालोपत्र बाहेकका अन्य योजनामा धेरै भिन्नता नदेखिएको बताउनुभयो । बागलुङका स्थानीय तहलाई चालु आर्थिक वर्षमा रु. चार अर्ब ७३ करोड ४७ लाख विनियोजन भएको थियो । यस्तै आर्थिक वर्ष २०८०/८१ मा बागलुङका स्थानीय तहलाई रु. चार अर्ब २६ करोड ३६ लाख बजेट प्राप्त भएको थियो ।