मन कुमारी के.सी, बागलुङ
क्षत्री समाज नेपाल गण्डकी प्रदेश समितिको पूर्ण बैठक तथा प्रशिक्षण कार्यक्रम पवर्तको कुश्मामा सम्पन्न भएको छ । बैठकमा क्षत्री समाज नेपाल गण्डकी प्रदेशका जिल्ला अध्यक्ष, पदाधिकारी र सदस्यलाई सम्बोधन गर्दैै समाजका केन्द्रीय उपाध्यक्ष अमृता बानियाँले क्षेत्री समाज नेपाल क्षेत्रीका छोराछोरीलाई संगठित गर्ने अभियानमा लागेको बताउनु भएको छ ।
उहाँले समाजले क्षत्रीका नयाँ पुस्तालाई समाजको संस्कृति संस्कार, परम्परा र अभियान र आन्दोलनको बारे जानकार बनाउनका लागि पनि क्षत्रीका छोराछोरी संगठित गर्न लागिएको बताउनु भयो । उहाँले समाजका महिला र बालबालिकालाई ढाला र तरबारको खेल सिकाउने, विभिन्न विषयमा प्रशिक्षित गरेर अगाडी बढ्ने योजना र कार्यक्रम ल्याएको समेत बताउनु भयो ।
सो अवसरमा समाजका केन्द्रिय महासचिव कृष्ण थापाले समाजले प्रशिक्षण विभाग गठन गरेर प्रदेश, जिल्ला र वडा स्तरसम्मै प्रशिक्षण कार्यक्रम गर्ने योजना बनाएको बताउनु भएको थियो । उहाँले समाजलाई संगठित र अझै मजबुत बनाउनका लागि विभिन्न १ सय ४२ थरका क्षत्रीहरुलाई क्षत्री समाजमा आवद्ध हुन आव्हान गर्ने समेत बताउनु भयो । थर थरका समाज गठन गरेर सक्रियताका साथ काम गरिरहेका क्षत्रीहरुलाई क्षत्री समाजमा पनि जोडेर राष्ट्रिय भेलाको आयोजना गरिने उहाँको भनाई थियो ।
गण्डकी प्रदेशका विभिन्न जिल्लाका जिल्ला अध्यक्षहरुले जिल्लाको प्रतिवेदन प्रस्तुत गर्नु भएको थियो । बैठकमा केन्द्रिय सदस्य तथा पर्वत जिल्ला इन्चार्ज सेती महत र सम्पूर्ण जिल्ला अध्यक्षको तर्फबाट क्षत्री समाज बागलुङका अध्यक्ष रुद्र महतले बोल्नु भएको थियो ।
पूर्ण बैठकसहित आयोजना गरिएको प्रशिक्षणमा कार्यक्रममा क्षत्री समाज बागलुङका संस्थापक रामबहादुर जि.सी, क्षत्री पत्रकार समाज बागलुङका उपाध्यक्ष सिर्जना पन्त र सन्दिप थापाले प्रशिक्षण दिनु भएको थियो । जिसीले उत्प्रेरणा, सामाजिक सञ्जालको प्रयोग, पन्तले संगठन र समाज निर्माणमा महिलाको भूमिका, चुनौतिको विषयसहित थापाले ध्यानको विधिबाट कसरी शान्त हुने भन्ने विषयमा प्रशिक्षित गर्नु भएको थियो ।
क्षत्री समाज नेपाल गण्डकी प्रदेशले प्रत्येक तीन महिनामा घुम्ती बैठकको आयोजना गर्दै आएको छ । समाजले पूर्ण बैठक सहित विभिन्न विषयमा प्रशिक्षण समेत गर्दै आएको छ । २०८२ सालको पहिलो बैठक पर्वतमा आयोजना गरेको समाजले आगामी बैठक बागलुङ जिल्लामा गर्ने निर्णय गरेको क्षत्री समाज नेपालका गण्डकी प्रदेश अध्यक्ष इन्द्रमान खत्रीले जानकारी दिनुभयो ।
बैठक तथा प्रशिक्षण कार्यक्रम क्षेत्री समाज नेपाल गण्डकी प्रदेशका अध्यक्ष इन्द्रमान खत्रीको अध्यक्षता, क्षत्री समाज नेपाल पर्वतका अध्यक्ष सरस्वती भण्डारीको स्वागत तथा प्रदेश सचिव कृष्ण बहादुर घिमिरे र पर्वतका सचिव कमल जिसीको सञ्चालनमा सम्पन्न भएको थियो ।