आदर्श अनलाइन, म्याग्दी
पश्चिम म्याग्दीको धवलागिरी गाउँपालिकाले अपाङ्गता भएका नागरिकलाई घरमै पुगेर सेवा दिने उद्देश्यले थालेको घुम्ति शिविरबाट दुई सय भन्दा बढी अपाङ्गता भएका नागरिकलाई आफ्नो थातथलोमा सेवा प्रदान गरेको छ । गाउँपालिकाले शिविरको माध्यमबाट दुई सय सात जना अपाङ्गता भएका व्यक्तिहरुलाई सेवा प्रदान गरेको हो ।
गाउँपालिकाले पछिल्लो एक हप्ताको समयमा ५ वटा वडामा गरेको घुम्ति शिविरबाट ७७ जनालाई अपाङ्गता परिचयपत्र प्रदान गरेको छ भने एक सय ३० जनालाई सहायता सामग्री वितरण गरेको हो । शारिरिक रुपमा अशक्त नागरिकको सहजताका लागि वडा स्तरमा पुगेर परिचयपत्र र सहायता सामग्री वितरण गरिएको गाउँपालिकाका प्रमुख प्रशासकिय अधिकृत कृष्णप्रसाद सुवेदीले जानकारी दिनुभयो ।
उहाँका अनुसार गाउँपालिकाको वडा नम्बर २ मा पाँच जना, वडा नम्बर ३ मा १४ जना, वडा नम्बर ४ मा १४ जना, वडा नम्बर ६ मा आठ जना र वडा नम्बर ७ मा ३६ जना अपाङ्गलाई परिचयपत्र वितरण गरिएको छ । ९५ जना अपाङ्गलाई लठ्ठी, पाँच जनालाई वैशाखी, नौ जनालाई वलाइन्ड स्टिक (ह्वाइट क्यान), छ जनालाइ कम्बोड कुर्ची र १५ जनालाई कम्मर पेटी (वेल) उपलब्ध गराइएको छ ।
अर्को चरणमा ह्वील चियर प्रयोग गर्ने अपाङ्गताहरुलाई ह्विइल चियर पनि वितरण गर्ने कार्यक्रम रहेको गाउँपालिकाले जनाएको छ । गाउँपालिकाको कार्यालय रहेको मुना पुगेर लिनुपर्ने सेवा सर्वसाधारणले वडामै सेवा पाउँदा सहज भएको अपाङ्गता भएका नागरिकहरुले बताएका छन् ।
गाउँपालिकाका उपाध्यक्ष रेशम पुनमगर, प्रमुख प्रशासकीय अधिकृत कृष्णप्रसाद सुवेदी, बेनी अस्पतालका चिकित्सक डा. रोशन आचार्य, वडा अध्यक्ष, कार्यपालिका सदस्य, गाउँपालिकाका कर्मचारी, स्वास्थ्य शाखाका सहसंयोजक अनिशा आचार्य लगायतको टोलीले परिचयपत्र र सहायता सामग्री वितरण गरेको थियो ।
वडामै निवेदन संकलन गरि अपाङ्गता समन्वय समितिको बैठक बसेर निर्णय गरि परिचयपत्र वितरण गर्ने व्यवस्था मिलाइएको प्रमुख प्रशासकीय अधिकृत सुवेदीले बताउनुभयो । अपाङ्गता भएका नागरिकहरुले परिचयपत्रको आधारमा सार्वजनिक यातायात लगायत क्षेत्रमा पाउनुपर्ने छुट सुविधा नपाएको विषयमा गाउँपालिकासँग गुनासो गरेका थिए ।